Sísifo e Penélope

Imaxe da cabeceira do noso primeiro blog

Conta o mito que Sísifo, fillo do deus Eolo, foi condenado por Zeus a subir ao alto dunha montaña cargando unha enorme rocha. Mais, chegando ao cume, a rocha cáelle e rola costa abaixo ata chegar de novo á aba da montaña.
Triste destino, o de ter que repetir unha e outra vez o mesmo traballo sen perspectivas.

Contan os feitos que, correndo o mes de abril do ano 2007, desde a Biblioteca Escolar comezamos a aventura de publicar o noso primeiro blog, co título Paxaros na Cabeza. Fixémolo con moito ánimo e adicación, sen dúbida. Mais no mes de xuño do ano 2011, despois de comparar o esforzo  e o tempo adicados coa súa incidencia real  na nosa comunidade educativa, decidimos facer unha pausa e reflexionar sobre o para que.
Necesario destino, o de reflexionar sobre o que se fai para mellorar os resultados.

Conta a lenda que Penélope, agardando o regreso do seu esposo Ulises da guerra de Troia, era solicitada en matrimonio por moitos pretendentes. Confiando en que Ulises estaba vivo e voltaría, Penélope afirmou que elixiría novo esposo cando acabase de tecer un sudario para o pai de Ulises. E para que o tempo correse ata o regreso do seu amado, destecía de noite o que de día tecía.
Esperanzado destino, o de realizar repetidamente un traballo agardando un resultado no que se confía.

E aquí estamos, unha outra vez, abrindo un novo blog.
Ben se ve que optamos por Penélope.