Día da Ciencia en Galego 2019

O día 3 de maio celebrouse no centro a segunda edición de Ciencia en Galego. O alumnado expuxo, nunha xornada de portas abertas, os seus experimentos e as aprendizaxes realizadas nas aulas de ciencias da natureza, tecnoloxía e física e química, e asemade deulles visibilidade a algúns aspectos cos que aínda andamos a voltas neste século: en galego tamén se fai ciencia e a ciencia non ten sexo.
Parabéns a todas as persoas fixeron posible esta actividade.

Master-Class con Carlos Negro

O pasado mércores, día 27 de marzo, o alumnado de terceiro tivo a ben asistir no Salón de Actos a un encontro co escritor e poeta Carlos Negro, ao longo do cal este autor realizou unha aproximación á súa obra Penúltimas tencencias.

Os nosos alumnos e alumnas ían ben preparados, pois xa traballaran previamente os poemas, xa realizaran actividades gráficas baseadas neles e mesmo se animaron a producir versos propios. Algunha imaxe disto que vos dicimos pode verse se consultades a web do noso instituto.

Aquí, e para completar a información, só queremos inserir dous vídeos da alocución de Carlos Negro, como unha mostra do que as rapazas e os rapaces poideron escoitar e aprender:

  

Dar forma a unha composición escrita

Unha das actividades escolares que esixe un pouco de atención e esforzo é a composición escrita, isto é, saber escribir textos con corrección e saber darlle unha presentación atractiva.

Actualmente, moitos dos traballos escolares que se escriben para ser presentados están elaborados usando un procesador de textos. Exemplos de procesadores de textos son Word ou Writter.

Compoñer un texto con estes procesadores parécese moito á escritura usando as antigas máquinas de escribir. A diferenza é que poucas persoas dominaban antes a mecanografía, mentres que hoxe parece que case todas as persoas saben manexar o teclado da computadora. E dicimos, a propósito, "parece" porque non sempre  é así.

Para axudar a compoñer textos usando a computadora, a Biblioteca Escolar coa colaboración do Equipo de Dinamización Lingüística, decidiu editar un pequeno folleto no que se divulgan as posibilidades que ofrece.

Podedes acceder a el picando sobre a imaxe e... que sexa de proveito!

Lectura de historias para pasar medo...

O Equipo de Dinamización Lingüística, conxuntamente coa Biblioteca, fixo unha selección de lecturas para neste Samaín se nos poidan poñer todos os pelos de punta. Non pensedes que é unha esaxeración e atrevédevos...!

Este é o cartel que se elaborou para difundilos:

A saúde da lectura en Sigüeiro

A lectura goza de boa saúde?

Para pulsar o grao de vitalidade en lectura da veciñanza de Sigüeiro, dúas alumnas e un alumno do IES de Oroso realizou entrevistas a varias persoas vinculadas á lectura e ao seu mundo e tamén a lectores/as anónimos/as  que foron entrevistados na rúa.

Este traballo foi deseñado e supervisado polo Equipo de Dinamización Lingüística, e os seus resultados quedaron plasmados neste audiovisual:

As laranxas máis laranxas... de Carlos Casares

A finais do pasado curso 2017-18, o noso alumnado de primeiro interpretou a obra de teatro de Carlos Casares As laranxas máis laranxas de todas as laranxas. Os ensaios previos foron realizados polo Departamento de Lingua Galega en colaboración co Equipo de Dinamización Lingüística.

En Arca Alexandrina pensamos que sería unha mágoa non poder gozar novamente desta actuación, aínda que sexa en diferido, porque os actores e actrices meréceno. Aí vai:

Contacontos para os nenos e nenas de Educación Infantil

A quen non lle gusta que lle conten historias?

Contar historias é un acto de enorme atractivo e tan vello como a propia humanidade. Hoxe maniféstase utilizando medios moi variados: libros, poesías, cancións, filmes. Mais aínda que hoxe as series da televisión son o xeito de máis éxito, nada lle quita a fascinación á transmisión oral ben realizada. Acaso non hai miles de persoas que escoitan podcasts?

Pois o pasado día 19 de xuño o Equipo de Dinamización Lingüística realizou co noso alumnado de segundo e de cuarto unha actuación para os alumnos de Educación Infantil do CEIP de Sigüeiro, que consistiu na lectura dramatizada de varias historias escritas en libros infantís. Transmisión oral de textos escritos combinada coa súa dramatización. E en persoa, sen unha pantalla actuando de intermediaria.

As secuencias de vídeo que presentamos mostran a beleza deste acto de comunicación.

Que veñan moitos máis.

Feira da Ciencia 2018

O pasado venres, día 27 de abril, celebrouse no IES de Oroso o Día da Ciencia cunha mostra de proxectos realizados polo alumnado de segundo, terceiro e cuarto que poideron contemplar e gozar todas as persoas vinculadas dalgún xeito ao noso centro.

Como unha contribución máis a esta celebración a Biblioteca Escolar (en colaboración co Equipo de Dinamización Lingüística e o Departamento de Bioloxía e Xeoloxía) elaboraron un Calendario Orbital que permite localizar ao longo deste ano 2018 a ubicación do noso planeta na órbita que describe arredor do Sol.

Clica na imaxe para descargar o calendario en formato pdf

Unha versión impresa deste calendario foi posta a disposición de todos os visitantes á Feira da Ciencia. Se a ti tamén che interesa, podes descargar unha copia clicando sobre a imaxe.

Tamén podes facerte unha idea do animado que estivo o noso instituto visualizando un pequeno álbum de fotos desta Feira da Ciencia 2018.

A Televisión de Galicia visita o IES de Oroso

O pasado día 24 de novembro, tivemos a honra de recibir a visita da TVG. O motivo era a celebración do Dia Internacional pola eliminación da violencia contra a muller nos centros educativos.

A pequena reportaxe foi emitida no Telexornal Mediodía do mesmo día 24, e foi subido á web nos días posteriores acompañado do seguinte texto:

"Nos centros de secundaria din que a concienciación contra a violencia machista xa non é algo que se trate só con accións simbólicas dun Día... 'O das máscaras representa como as mulleres temos que calar... Simboliza a submisión', din dúas alumnas do IES de Oroso.
"Alumnos e alumnas recoñecen que a formación en igualdade e contra a violencia machista forma parte dos seus contidos escolares, cada vez máis fóra da área de orientación e titorías e máis vinculados co resto das materias. De portas para dentro do centro senten que as relacións xa son moi igualitarias, pero portas para fóra din que aínda queda moito por facer... 'Cando tomamos a iniciativa somos máis xulgadas', 'Os homes van máis soltos... mentres que se nós facemos o mesmo discrimínannos e dinnos que somos 'unhas...', contan as alumnas.
" 'Eu creo que imos cara adiante, pero é un proceso lento e longo', conclúe un alumno do mesmo Instituto de Oroso."

  Podes ver a a reportaxe completa picando aquí.
__________
Fonte das imaxes: TVG

"CACHEINO!": primeira emisión en probas de O CanLE

Interésanvos as actividades de Busca ou as de Videocoaching?
Nós, no IES de Oroso, fixemos unha mestura das dúas, e chamámoslle... CACHEINO!

Esta actividade é unha especie de Busca do Tesouro, que fixeron algúns dos nosos profesores. O xogo realízase por parellas: a cada parella dábanlle un mapa cos puntos cardinais e unha pista que a levaba a algún lugar do noso instituto. E, unha vez alí, había que buscar o que estaba agochado, que era... un libro!

Os libros cedéronos algúns compañeiros de cuarto, algúns profesores e a librería Aula 10.

Queda inaugurado... O CanLE!